गडचिरोली जिल्ह्यात हल्ला करायला आलेल्या वाघावर एका गुरख्याने केला परतवार

गडचिरोली : या जिल्ह्यामध्ये बोदली जंगल परिसरात एका गुरख्याने आपल्या हिमतीच्या जोरावर वाघाशी दोन हात केल्याची बातमी समोर आली आहे.

यादव जराते असे या हल्ल्यात जखमी झालेल्या व्यक्तीचे नाव आहे. कुऱ्हाड व काठीच्या भरवशावर त्याने हा हल्ला परतून लावला.मिळालेला माहितीनुसार यादव जराते हे अनेक वर्षंपासून गुरे ढोरे चराईचे काम करतात.

त्यांच्याजवळ असलेल्या जनावरांसोबत ते इतर लोकांचे पण गुरे राखतात, त्यासाठी नेहमीप्रमाणे ते गुरे चराईसाठी बोधले गावापासून काही अंतरावर असलेल्या जंगलात गेले होते.तेव्हा वाघाने यादव जराते यांच्यावर मागून हल्ला केला.या हल्ल्यात यादव यांच्या पाठीवर व मांडीवर वाघाच्या पंजाचे ओरखडे पडले.

वाघाने यादव यांची मान पकडली नाही त्यामुळे ते थोडक्यात बचावले, तेव्हा त्यांनी हातात असलेल्या कुऱ्हाडीने स्वतःचा बचाव केला. परंतु यात ते जखमी झाले, आता सध्या त्यांच्यावर जिल्हा सामान्य रुग्णालयात उपचार सुरू आहे.