गोंदिया जिल्ह्यातील पेट्रोलिंग वर असलेल्या पोलिसांनी तरुणाकडुन 8 लाख 68 हजार 630 रुपयांचा गांजाचा माल केला जप्त

गोंदिया: या जिल्ह्यामध्ये पेट्रोलिंग वर असलेल्या पोलिसांनी ट्रॉली बॅगमध्ये गांजा घेऊन जात असताना एका तरुणाला पकडल्याची बातमी समोर आली आहे .मिळालेल्या माहितीनुसार पोलिसांनी गांजा व अन्य सामानासोबत एकूण आठ लाख 68 हजार 630 रुपयांचा माल जप्त केला आहे.

रामनगर पोलीस ठाण्याच्या हद्दीत स्थानिक गुन्हे शाखेच्या पथकाने अवैध धंदे, गुन्हेगार शोध, गुन्हे प्रतिबंधक पेट्रोलिंग करत असताना, त्यांना रेलटोली मालधक्का परिसरात रेल्वे स्टेशन कडून हनुमान मंदिराकडे एक तरुण ट्रॉली बॅग सह संशयास्पद स्थितीत दिसून आला .पथकाने त्याला थांबवून चौकशी केली असता ,त्याने आपले नाव सतीश दीनानाथ उपाध्याय असे सांगितले.हा तरुण पंचवीस वर्षाचा असून तो तिलवारा घाट जिल्हा जबलपूर -मध्यप्रदेश मध्ये राहणार आहे.

पोलिसांनी त्याच्या ताब्यातून दोन ट्रॉली बॅग, एक सॅक बॅग जप्त केली असून, त्यात १४ पाकिटे दिसून आली व त्यात २८ किलो १२० ग्रॅम गांजा मिळून आला. या प्रकरणातील आरोपी भोला प्रकाश यादव (२०, रा. तिलवाराघाट) हा फरार झाला आहे. या दोन्ही आरोपींवर रामनगर पोलिसात एनडीपीएस कायदा कलम ८ (क), २०, २९ अन्वये गुन्हा दाखल करण्यात आला आहे.

ही कारवाई पोलिस अधीक्षक गोरख भामरे, अप्पर पोलिस अधीक्षक नित्यानंद झा यांच्या निर्देशाप्रमाणे स्थानिक गुन्हे शाखेचे पोलिस निरीक्षक दिनेश लबडे यांच्या मार्ग- दर्शनात सहायक पोलिस निरीक्षक संजय तुपे यांनी केली आहे.