भंडारा येथील पवनीमध्ये बोलेरो कारच्या धडकेत एक ठार ,एक गंभीर जखमी..

भंडारा : या जिल्ह्यातील पवनी तालुक्यात बोलेरो कारने दुचाकीला जोरदार धडक दिली.यात एका व्यक्तीचा जागीच मृत्यू झाला. तर दुसरा व्यक्ती गंभीर जखमी आहे .गंभीर जखमी झालेल्या व्यक्तीला भंडारा जिल्हा रुग्णालयात नेण्यात आले. मिळालेल्या माहितीनुसार हा अपघात पवनी ते सिरसाळा या दरम्यान झाला .
या अपघातामुळे गावात शोककळा पसरली आहे .

भोजराज उष्टीराम लोणारे(४६) ,असे मृताचे नाव आहे. तर बालकदास गुलाब रामटेके (५५),असे गंभीर जखमी झालेल्या व्यक्तीचे नाव आहे.हे दोघेही कन्हाळगाव येथे राहणारे आहेत.

या घटनेत भरधाव येणाऱ्या बेलोरोची (एमएच ३४, एफ २२३४) दुचाकीला जोरदार धडक बसली. हा अपघात एवढा भयंकर होता की भोजराज लोणारे यांच्या डोक्याला गंभीर दुखापत झाल्याने प्रचंड रक्तस्त्राव होऊन त्यांचा जागीच मृत्यू झाला, तर बालकदास रामटेके यांच्या डोक्याला तसेच पायाला गंभीर दुखापत झाली.

त्यांना प्राथमिक उपचारासाठी पवनीच्या रुग्णालयात दाखल करण्यात आले. मात्र प्रकृती गंभीर असल्याने भंडारा जिल्हा सामान्य रुग्णालयात रेफर करण्यात आले.