भंडारा: या जिल्ह्यातील तुमसर मोहाडी विधानसभा मतदारसंघाच्या मैदानात गडचिरोली जिल्ह्यातील अहेरी प्रमाणे दोन्ही राष्ट्रवादी समोरासमोर लढणार असल्याची बातमी समोर आली आहे .यात महाविकास आघाडीकडून माजी आमदार चरण वाघमारे तर महायुतीकडून विद्यमान आमदार राजू कारेमोरे यांना उमेदवारी देण्यात आली आहे .
राज्यातील 11 विधानसभा मतदारसंघात राष्ट्रवादीचा अजित पवार गट आणि शरद पवार गट समोरासमोर आले आहेत या तुमसर विधानसभा मतदारसंघातील अजित पवार गटाकडून राजू कारेमोरे हे उमेदवार आहेत तर या मतदारसंघात खासदार प्रफुल्ल पटेल यांच्यासाठी ही लढत प्रतिष्ठेची मानली जात आहे .
दुसरीकडे चरण वाघमारे यांना थेट मुंबईतून तिकीट मिळाले असून शरद पवारांनी ते निश्चित करुण दिले होते.त्यासोबतच काँग्रेस प्रदेशाध्यक्ष नाना पटोले हे सुद्धा वाघमारे यांच्या उमेदवारीसाठी आग्रही होते.
त्यामुळे शरद पवार गटासाठीही ही निवडणूक तेवढीच प्रतिष्ठेची मानली जात आहे. चरण वाघमारे यांनी भारतीय जनता पक्ष सोडून २०१९ मध्ये
अपक्ष निवडणूक लढली होती. त्यात त्यांना ७,७०० मतांनी पराभव पत्करावा लागला होता. राष्ट्रवादी काँग्रेसचे राजू कारेमोरे विजयी झाले होते.
आता मात्र काँग्रेस व शरद पवारांच्या राष्ट्रवादीतील अनेक नेते वाघमारे यांच्या विरोधात उतरले आहेत. परिणामी त्यांना निवडणूक सोपी नाही, हेही तितकेच खरे आहे.
